Prizren: Ruzhdi Rexha përkrah PDK-së, LDD-ja përkrah LDK-së

Partia Demokratike e Kosovës ka arritur një marrëveshje në Prizren, nga e cila shpreson që ta ruajë komunën të cilën e kontrollon që nga viti 2007. Në pasditen e së premtes, siç bën të ditur e përditshmja Express, kandidati i kësaj partie për kryetar komune, Ramadan Muja ka nënshkruar marrëveshje me rivalin e tij të raundit të parë, Ruzhdi Rexha nga koalicioni LDD-AKR.
Dëshmitar i arritjes së kësaj marrëveshjeje ka qenë edhe vetë kryetari i PDK-së, Hashim Thaçi, i cili ka qëndruar në Prizren të premten pasdite për të qenë i pranishëm në këtë ngjarje.

Si pjesë e marrëveshjes, Rexha do të jetë pjesë e ekipit të Ramadan Mujës në fushatën shtatëditore të garës së balotazhit. E nëse Muja fiton zgjedhjet, atëherë Ruzhdi Rexha do të jetë nënkryetar i komunës, bën të ditur kjo gazetë

Në raundin e parë të zgjedhjeve, Ruzhdi Rexha, si kandidat i përbashkët për kryetar komune në Prizren, nga koalicioni LDD-AKR, mori 14 për qind të votave, përkatësisht 7,273 , përgjysmë më shumë se LDD-ja e cila ka marrë 3.506 vota dhe do të përfaqësohet në Kuvend me 3 këshilltarë komunalë.

Por Rexha nuk ka pas vetes subjektin e tij politik në këtë marrëveshje, pasi që, ditë më parë, Dega e LDD-së në Prizren zyrtarizoi mbështetjen për rivalin e Ramadan Mujës, kandidatin e PDK-së, Hanefi Muharremi.