KQZ certifikon zgjedhjet për kryetarë të komunave

Komisioni Qendror i Zgjedhjeve, në pajtim me autorizimet që ka sipas ligjeve në fuqi, të premten ka certifikuar rezultatet përfundimtare të zgjedhjeve lokale të 15 nëntorit për kryetarë të komunave.
Në pikën I të vendimit thuhet se, pas përfundimit të të gjitha procedurave në vendvotime dhe në Qendrën e Numërimit dhe Rezultateve si dhe kur të gjitha vërejtjet e dala që u përkasin votimit dhe numërimit janë vendosur nga Komisionit Zgjedhor për Ankesa dhe Parashtresa (KZAP) dhe nga Gjykata Kushtetuese, Komisioni Qendror i Zgjedhjeve certifikon rezultatet përfundimtare të zgjedhjeve lokale të 15 nëntorit 2009 për kryetarë të komunave si në vijim:

Deçan, Gjakovë, Drenas, Gjilan, Dragash, Istog, Kaçanik, Klinë, Fushë Kosovë, Kamenicë, Mitrovicë, Leposaviq, Lipjan, Novobërdë, Obiliq, Rahovec, Pejë, Podujevë, Prishtinë, Prizren, Skenderaj, Shtime, Shtërpce, Suharekë, Ferizaj, Viti, Vushtrri, Zubin Potok, Zveqan, Malishevë, Junik, Mamushë, Hani i Elezit, Graçanicë, Ranillug dhe Kllokot.

Në pajtim me rezultatet përfundimtare të zgjedhjeve nga pika I e këtij vendimi, Raundi i II-të i zgjedhjeve për kryetar të komunave për kandidatët e subjekteve politike përkatëse do të organizohet me 13 dhjetor 2009 në komunat si në vijim: Gjilan, Dragash, Istog, Kaçanik, Klinë, Kamenicë, Mitrovicë, Lipjan, Novobërdë, Obiliq, Rahovec, Pejë, Podujevë, Prizren, Shtërpce, Suharekë, Viti, Vushtrri, Malishevë, Junik dhe Hani i Elezit.

Po ashtu theksohet se këto rezultate janë përfundimtare dhe detyruese. “Obligohet Sekretariati i KQZ-së që t’i publikojë në formë tabelare rezultatet përfundimtare të zgjedhjeve në pajtim me këtë vendim”, thuhet në vendimin e nënshkruar nga kryetarja e KQZ-së, Nesrin Lushta, që ka hyrë në fuqi të premten, më 4 dhjetor.