Thirrje Egjiptit ta njohë Kosovën

Titulli: Thirrje Egjiptit ta njohë Kosovën Tue Dec 01 2009, 21:00

Zv/ministrja e Punëve të Jashtme të Shqipërisë, Edith Harxhi përfundoi turin e saj në Lindjen e Mesme me një vizitë në Republikën Arabe të Egjiptit, ku ndër të tjera, sikurse edhe në takimet të tjera të saj, ka kërkuar njohjen e pavarësisë së Kosovës.

Duke trajtuar zhvillimet në Ballkan, Harxhi e vuri theksin tek efektet pozitive dhe tek klima e re e paqes dhe sigurisë në rajon që kanë shoqëruar krijimin dhe konsolidimin e shtetit të ri të Kosovës.

Në këtë kontekst, ajo shënoi rëndësinë që Egjipti, një vend i madh, mjaft i rëndësishëm dhe mik i Shqipërisë dhe i shqiptarëve, të njohë Kosovën sa më parë, gjë për të cilën u sigurua se do të ndodhe në një periudhë të shpejtë.

Harxhi zhvilloi një takim të veçantë edhe me sekretarin e përgjithshëm të Ligës Arabe, Amr Moussa.

Moussa vlerësoi progresin e bërë nga Shqipëria në procesin e integrimit evropian dhe e cilësoi si të rëndësishëm rolin që ky vend mund të luajë në dialogun ndërmjet Bashkimit Evropian e vendeve të botës arabe dhe Konferencës Islamike në përgjithësi.

Po ashtu ai u shpreh se do të ndjekë dhe mbështesë brenda 22 vendeve anëtare të Ligës Arabe njohjen sa më të shpejtë të pavarësisë së Kosovës dhe siguroi zv/ministren se së shpejti numri i shteteve që njohin Kosovën do të rritet edhe brenda vendeve të Ligës Arabe dhe Konferencës Islamike.

Gjatë qëndrimit në Egjipt, Harxhi zhvilloi një takim edhe me Kryetarin e Komisionit të Jashtëm të Senatit, ku krahas trajtimit të çështjeve lidhur me nivelin dhe perspektivën e bashkëpunimit dypalësh, u përqendrua në aspekte që kishin të bënin me rëndësinë e njohjes së Kosovës nga Egjipti dhe në nevojën e nxitjes së marrëdhënieve ndërparlamentare midis dy vendeve.

Në kuadër të kësaj vizite, delegacionet e të dy vendeve, të kryesuara respektivisht nga Zv. Ministrja, znj. Edith Harxhi, dhe homologu i saj egjyptian, u zhvilluan konsultimet politike dypalëshe, duke mundësuar kështu shkëmbimin e mendimeve dhe pikëpamjeve për gjithë spektrin e bashkëpunimit dypalësh dhe atij shumëpalësh.

Znj. Harxhi, bëri një prezantim të zhvillimeve të gjithanshme pozitive në Shqipëri, veçanërisht lidhur me treguesit ekonomik e masat e marra për nxitjen e biznesit dhe investimeve të huaja, si dhe lidhur më progresin në rrugën e integrimit europian, dhe shprehu besimin dhe dëshirën për një prezencë më të madhe të investimeve egjiptiane në Shqipëri.